Хоро нэһилиэгэр «Аан дойдутааҕы Аҕам саастаахтар күннэрин»чэрчитинэн, алтынньы 9 күнүттэн 13 күнүгэр диэри, Майаҕас бөһүөлэгин тэрилтэлэрэ кыттыылаах «Сааһырбыттар декадалара» буолан ааста.
Алтынньы 9 күнүгэр Майаҕастааҕы «Түмсүү» НАК көҕүлээһининэн, «Эрэл» ыччат түмсүүтүн эдэр хаһаайкалара минньигэс бурдук аһа астаан, 7-с төгүлүн «Экипаж милосердия» акцияҕа кыттыыны ыллылар, уопсайа 11 ытыктыыр аҕа саастаах ветеран дьоннорбутун минньигэс аһынан күндүлээтилэр.
Алтынньы 10 күнүттэн-12 күнүгэр диэри Олохтоох дьаһалта, спортинструктор, «Алгыс» бэтэрээннэрин сэбиэтин бэрэссэдээтэлэ, Аҕам саастаахтар икки ардыларыгар араас спортивнай күрэхтэри ыыттылар ол эбэтэр: дартс, буулдьанан ытыы, теннис, дуобат, мээчик быраҕыыта, хабылык-хаамыска, эстафета. Күрэх аайы кыайыылахтарга грамота уонна мэтээл туттардылар.
Нэдиэлэ устата дьиэнэн сылдьан патронаж уонна грипп утары вакцина биэрээһинэ,нэһилиэнньэ олохтоохторугар «Профилактика болезни сердца» информационнай бэсиэдэ Майаҕастааҕы ФАП фельдшера ыытта.
С.Г.Крылов аатынан Майаҕастааҕы модельнай библиотека «Мин сааһым, мин баайым» аһаҕас аан күннэрэ, аҕам саастаах дьоҥҥо сүбэ-ама, саҥа сурунаал, кинигэ, хаһыат уларсыыта, истиҥник сэһэргэһии, викториналар ону таһынан Мүрү нэһилиэгин олохтооҕо Марфа Николаевна оҕуруо оҥоһугун быыстапката, оҕуруонан тигиигэ маастар кылаас уо.д.а. туһалаах тэрээһиннэр буоллулар.
Майаҕастааҕы В.А.Протодьяконов-Кулантай аатынан орто оскуолатын коллектива уонна үөрэнээччилэрэ Ветеран учууталларга оҕолор бэйэ илиинэн оҥоһуллубут өйдөбүнньүк открыткаларын, минньигэс бурдук астарын бэлэхтээтилэр. Оскуолаҕа «Мин эбээм, эһээм…» хаартыска быыстапката турда.
«Чуораанчык» оҕо уһуйаанын көҕүлээһининэн, төрөппүттэр кыттыылаах «Үтүө санаа пуолката» тэриллэн, уһуйаан ветераннарыгар, бырааһынньыгынан эҕэрдэлээн ас бэлэх ууннулар.
Алтынньы 13 чыыһылатыгар Аҕам саастаахтар декадатын сабыллыытын үөрүүлээх чааһыгар эҕэрдэ нүөмэрдэр, наҕараадалааһыннар, сандалы остуол, көхтөөх оонньуулар, байаанынан үҥкүү киэһэтэ буолан ааста. Бу тэрээһиммитигэр Мүрү нэһилиэгин үһүс оскуолатын «Күндүүнэлэр» түмсүү кыттыылаахтара ыалдьыт буолан көхтөөх кыттыыны ыллылар.
«Аҕам саастаахтар декадалара» ыытыллан, Майаҕас бөһүөлэгин саастаах дьоно араас күрэхтэргэ, оонньууларга, викториналарга уо.да. тэрээһиннэргэ кыттыыны ылан үөрэн-көтөн, сэргэхсийэн нэдиэлэлэрин атаардылар.
Ытыктыыр дьоммут, эһиги төрөөбүт нэһилиэккит сайдыытыгар кылааккытын киллэрбиккитин сыаналыыбыт, махтанабыт, киэн туттабыт! Оҕолоргут, сиэннэргит, аймахтаргыт сылаас истиҥ сыһыаннарыгар угуттанан уһун үйэни, чэгиэн доруобуйаны, дьолу-соргуну баҕарабыт!
