История

МАЙАҔАСТААҔЫ «ТҮМСҮҮ»

НОРУОТ АЙЫМНЬЫТЫН КИИНЭ»

муниципальнай бюджетнай тэрилтэ

Майаҕаска культура сайдыыта 1931 сыллаахха ааҕар балаҕан аһыллыытыттан саҕаламмыта.

Ааҕар балаҕан сэбиэдиссэйдэринэн үлэлээбиттэрэ:

1931 сыл – Бурцев Данил Гаврильевич;

1937 сыл – Копырин Петр Петрович;

1938-1941 сыллар – Бурцева Парасковья Афанасьевна;

1945-1948 сыллар – Крылов Семен Гаврильевич;

1948 сыл – Колодезникова Елена Николаевна.

1950 сыллаахха оройуоннааҕы культура отделын ыйыытынан, Майаҕас бөһүөлэгэр тыа сирин кулууба холкуос кыра дьиэтигэр арыллыбыта. Манна сэбиэдиссэйинэн Аммосов Макар Гаврильевич үлэлээбитэ. 1956 сыллаахха бэрэссэдээтэл Колодезников Петр Иванович салалтатынан кулуупка сөптөөх кыра дьиэни холкуостаахтар тутан биэрбиттэрэ. Кулууп үлэтэ 1964 сылтан көхтөөхтүк тэриллибитэ. Бу сыл сэбиэдиссэйинэн Новогодин Лаврентий Петрович, оскуолаҕа директорынан Колодезников Иван Степанович үлэлии кэлбиттэрэ. Үҥкүүһүт идэлээх Александров Гаврил Ильич кэлбитэ. Мантан саҕаламмыта оскуола оҕотуттан улахан дьонугар тиийэ уус-уран самодеятельноска активнайдык кыттыыта.

Ол курдук, бу сыл улахан дьон Ойуунускай суруйбут «Дьулуруйар Ньургун Боотур» олоҥхону туруорбуттара. Олоҥхону Лаврентий Новогодин туруорбута. Онно «Ньургун Боотур» оруолун Лаврентий Новогодин, Үрүҥ уоланы – Егор Тролуков, Уот Уһутаакыны – Никон Ховров, Айыы Умсуур удаҕаны – Антонина Скороходкина, Туйаарыма Куону – Анна Аммосова, Абааһы кыыһын – Татьяна Орлова, Любовь Пухова, Сорук Боллуру – Гаврил Александров, Иван Шестаков өрө күүрүүлээхтик, тахсыылаахтык оонньоон дьон биһирэбилин ылбыттара. Бу сылларга оччотооҕу «Маяк» холкуос уус-уран самодеятельноһа оройуон үрдүнэн аатырбыта, уус-уран көрүү бастыҥнара буолбуттара.

1968 сыллаахха «Маяк» холкуос холкуостаахтарын уопсай мунньаҕар, олохтоох Сэбиэт көҕүлээһининэн Майаҕаска 200 миэстэлээх кулуубу тутарга социалистическай эбэһээтэлистибэ ылыммыттара. 1971 сыллаахха «Маяк» холкуос (председатель Сивцев Иван Васильевич) 200 миэстэлээх типовой кулуубу тутан үлэҕэ киллэрбиттэрэ. Тутуу биригээдэтин биригэдьиирэ – Крылов Семен Дмитриевич.

Тутуу биригээдэтин састааба: Бурнашев Константин Николаевич, Тролуков Егор Семенович, Аммосов Иван Васильевич, Крылов Иннокентий Дмитриевич. Маны таһынан тутууга үлэлэспиттэрэ – Ховров Алексей Дмитриевич, Крылов Николай Филиппович, Стручков Николай Николаевич 1, о.д.а.

Маһын бэлэмнээһинигэр Крылов Николай Михайлович, Копырин Николай Иннокентьевич, Пухов Гаврил Иннокентьевич, о.д.а. үлэлээбиттэрэ. Маһын таһыытыгар Иванов Семен Васильевич, Ховров Никон Никонович, Крылов Коммунар Дмитриевич, Стручков Александр Гаврильевич, о.д.а. Кулууп тутуутугар субуотунньуктарга бөһүөлэк олохтоохторо оҕотуттан кырдьаҕаһыгар тиийэ активнайдык кыттыбыттара. 1971 сыллаахха саҥа 200 миэстэлээх кулууп дьиэтэ аанын тэлэччи аспыта.

Кулууп бастакы директорынан Готовцев Василий Давыдович үлэлээбитэ. Василий Давыдович дирижер-хоровик анал үөрэхтээх, үчүгэй куоластаах ырыаһыт этэ. Сымнаҕас, культурнай майгылаах буолан дьону тардара. Хору, ансаамбылы туруорууга бастакы анал үөрэтиини тэрийбитэ. 1973-1974 сылларга анал үөрэхтээх директор Егорова Варвара Романовна Танда кыыһа ананан кэлбитэ. Ити сыл агитзонанан үлэлэр тэтимнээхтик ыытыллар буолбуттара. Эдэр ыччат интэриэһин тардан, наһаа көхтөөх үҥкүүлэр буолаллара, ыччат сайдыыга тардыспыта. Варвара Романовна үөрэҕинэн спектаклы, сценкалары туруорууга, фольклор уус-уран жанрыгар дьону такайбыта.

1975 сылтан Семен Гаврильевич Васильев хоругар ыллаабыт директор Куличкина Анна Афанасьевна, уус-уран салайааччы Алексеев Анатолий Алексеевич салайыыларынан уус-уран самодеятельность, куруһуоктар үлэлэрэ күүскэ тэнитиллибиттэрэ. Араас биэчэрдэр, конкурстар оччотооҕу кэм ирдэбилигэр сөп түбэһиннэрэн ыытыллаллара. Элбэх киһилээх хор, үҥкүү коллективтара тэриллибиттэрэ. Агитзоналарынан үлэ тэтимин ыһыктыбакка барбыта. Саҥа дьиэҕэ киириэхтэн дьон-сэргэ кулуупка тардыһыыта эмиэ күүһүрбүтэ. Дьон сынньалаҥын тэрийиигэ сонун формалар булуллубуттара. Анна Афанасьевна кэрэ аҥардары дьиэ-уот, таҥас-сап, обществоҕа тутта-хапта сылдьыы уонна ас астааһыныгар үөрэтэн көҕүлээбитэ.

Анатолий Алексеевич тэрийэр, салайар, оҥорор, ыллыыр дэгиттэр талааннааҕа. Билиитинэн, сатабылынан ыччаты, олохтоохтору сатаан түмэрэ. Хойуу баттаҕа будьуруйан  кэлэн-баран, сүүрэн-көтөн элбэҕи оҥороро. Сүрэхтээх, наар үлэлии сылдьар буолара. Анатолийы дьон сөбүлээбитэ, тылын ылыннарара.

Бу сылларга дьиэ-уот ыраас буоларыгар өрүү кыһаллан түбүгүрэр уборщицалар Васильева Варвара Михайловна, Черноградская Анастасия Ивановна өр сылларга үлэлээбиттэрэ.

Культура дьиэтин үлэтэ көрдөрүүлээх буолбута. Оройуон культуратын тэрилтэлэрин куоталаһыыларыгар бириистээх миэстэлэргэ тиксэн Бочуот грамоталарынан, анал фондаларынан наҕараадаланаллара. 1975 сыллаахха тыа сирин кулууптарын Бүтүн Россиятааҕы көрүү кыайыылааҕа буолан РСФСР Культураҕа Министерствотын Дипломунан наҕараадаламмыттара.Манна олохтоох нэһилиэнньэ культураҕа тардыһыыта, кинилэр талааннара сайдыбыта.

Майаҕастар оҕотуттан-кырдьаҕаһыгар диэри ырыаһыттар. Бииртэн биир кэрэ куоластаах Иван Замятин, Анатолий Алексеев, Анна Куличкина, Мария Бурнашева, Валентина Охлопкова, Оксана, Михаил Ивановтар, Матрена Иванова, Рафаэль Дьячковскай, Николай Орлов, Константин Иванов оригинальнай жанрга Николай Копырин, ведущайдар Раиса Алексеева, Лукерия Ховрова, хоһоонньут Иван Шестаков күрэхтэһэр курдук ыллаан дьиэрэтэллэрэ, көрөөччү кутун туталлара.

80-сылларга бөһүөлэк уус-уран самодеятельноһын таһыма салгыы сайдыы таһымыгар тахсан испитэ. «Оскуола — прозводство — үрдүк үөрэх» девиһинэн ыччаттар кылааһынан производствоҕа тахсыбыттара. Күүстээх үлэ кэнниттэн киэһэ кулуупка мусталлара. Репетиция бөҕө буолара. Ордук чуолаан оскуолаҕа үөрэхтэрин бүтэрэн кэлбит учууталлар Мария Кондратьева, Галина Слепцова, Валентина Цой саҥа үҥкүүлэри туруоран күүстээх үҥкүү коллективын тэрийбиттэрэ.Уолаттартан Нифонт Протодьяконов, Кеша Крылов, Ким Кычкин, Сеня Петров 1, Саша Колесов, кыргыттар Маша, Анна Трулиналар, Саргы Колесова, Мария Кондратьева, Галина Слепцова, Агаша Иванова, Таня Ховрова, Валя Стручкова, Иван Петров бииртэн биир талааннаах ыччаттар этилэр. Араас омук үҥкүүтүн туруораннар, саҥаттан саҥа таҥас атыылаһан иистэнньэҥнэр Мария Максимовна Алексеева, Анна Петровна Емельянова, Октябрина Ивановна Петрова улахан күүс-көмө буолбуттара.

Оройуон бөһүөлэктэринэн гастрольнай бөлөх тэриллэн концертан киирбит харчынан музыкальнай аппаратура атыылаһан «Мүрүчээнэ» ВИА тэриллибитэ. Сүрдээх баҕалаах уонна талааннаах уолаттар араас сылларга ыллаан-туойан ааспыттара. Соло гитараҕа – Александр ­Дмитриев, ритм гитараҕа – Алексей Дмитриев, Анатолий Дмитриев, бас гитараҕа – Павел Емельянов, Григорий Петров, Семен Петров, ударнай инструменнарга – Анатолий Ховров, Семен Петров 1, Анатолий Стручков, солистарынан – Константин Иванов, Александр Орлов, Анатолий Ховров, Бүөккэ Бөтүрүөп «Мүрүчээнэ» ВИА оройуоҥҥа ыытыллыбыт «Мүрү-81», «Мүрү-82» ырыа конкурстарын лауреаттара буолбуттара. Республикатааҕы «Табык» рок-фестиваль кыттыылаахтара.

«Мүрүчээнэ» ансаамбылы салайбыт Бүөккэ Бөтүрүөп Саха республикатын культуратын туйгуна, Хоро нэһилиэгин бочуоттаах олохтооҕо, саха эстрадатын сулуһа, «Дуораан Рекордс» студия генеральнай директора, саҥа талааннары көрдөөһүҥҥэ күүскэ үлэлэһэр.

«Туймаада» государственнай вокальнай ансамбль солистката, Саха республикатын үтүөлээх артистката, республика культуратын туйгуна, Хоро нэһилиэгин бочуоттаах олохтооҕо Лина Акимова «Кэнчээри» ансамбльтан тирэх ылан, 1986 сыллаахха Мүрү орто оскуолатын бүтэрэн, музыкальнай училище вокальнай уонна дирижерскай-хоровой салааларга үөрэммитэ.

Үүнэр көлүөнэ государственнай театрын артыыһа, Саха республикатын культуратын үтүөлээх үлэһитэ, Хоро нэһилиэгин бочуоттаах олохтооҕо Семен Аммосов кэпсэтии, көр-күлүү жанрыгар таһаарыылаахтык үлэлээбитэ.

М.Мусоргскай аатынан Ураллааҕы консерваторияны ситиһиилээхтик бүтэрбит Саргылана Павлова Суорун Омоллоон аатынан Государственнай Опера уонна Балет театрыгар солистканан ситиһиилээхтик үлэлиир. Илин Сибиирдээҕи эдэр вокалистар региональнай конкурстарын лауреата, «Барҕарыы» фонда стипендиата, Грант Григорян аатынан республикатааҕы конкурс лауреата. Театрга  сэттэ сүрүн оруоллары толордо.

Үлэ дьонун чиэстээһин, юбилярдар биэчэрдэрэ, обрядовай, тематическай киэһэлэр тиһигин быспакка суббота ахсын буолаллара. Юбилейнай даталарынан улуустааҕы фестивалларга кыттан биристээх миэстэлэргэ тиксэллэрэ. Улуус культуратын дьиэлэрин социалистическай куоталаһыыларыгар 1982-84-85 сылларга 2-с бириистээх миэстэҕэ сылдьыбыттара, фондаларынан наҕараадаламмыттара. Улууска, республикаҕа биллэр ырыаһыттар Константин Иванов, Бүөккэ Бөтүрүөп бу сылларга талааннара арыллан иитиллэн тахсыбыттара.

1986 сыллаахха Аммосова Парасковья Петровна үлэлиир сылыгар специальноһынан дьону драмаҕа уонна сценкаҕа оонньуурга уһуйбута. 1987 сыллаахха Петрова Валентина Николаевна ыччаттар ортолоругар үҥкүү салгыы сайдыытыгар болҕомтотун уурбута. 1988 сыллаахха Чурапчы ыччата Макаров Иннокентий Иннокентьевич кулууп материальнай базата хаҥыырыгар үлэлэспитэ. Культура Министерствотыттан туруорсан элбэх араас музыкальнай аппаратураны аҕалтарбыта. Салгыы 1988-1999 сылларга директордарынан үлэлээбиттэрэ – Оксана Дьяконова, Александра Слепцова, Оксана Пухова, Альбина Афанасьева, 1990-1993 сылларга Күннэй Неус­троева, Мария Трулина, Павел Аммосов, Изабелла Старкова солбуһа сылдьан үлэлээбиттэрэ. Бу сылларга түөлбэнэн үлэ сөргүтүллүбүтэ, календарнай мероприятиелар былааннаахтык барбыттара. 90-с сыллар культураҕа олус күчүмэҕэй сыллар этилэр. Бюджекка үп-харчы дьиэни тутан олорууга эрэ көрүллэрэ. Сылы-сылынан хамнас кэлбэтэ, культура сайдыытыгар үгүс моһоллору үөскэппитэ.

1999 сыллаахха диэри кулууп ис-тас көстүүтэ улаханнык айгыраабыта. Үп-харчы көстүүтэ өссө ыарахан кэмэ. Нэһилиэнньэни түмэн «Мин дэриэбинэм – мин дьылҕам» акция-марафон ыыппыппыт.

Акцияттан киирбит харчынан нэһилиэнньэ көмөтүнэн субуотунньуктаан арыый сөргүтэн балаҕан ыйыттан директорынан Павлова Наталья Семеновна үлэтин саҕалаабыта. Биир дойдулаахтарын, нэһилиэнньэни түмэн «2000 сылга – 2000 үтүө дьыаланы» патриотическай хамсааһынынан, музыкальнай аппаратура ылыллыбыта. Нэһилиэнньэҕэ мониторинг ыытан, дьон интэриэһэ учуоттаммыта. Духуобунас, сиэр-майгы сайдарыгар үлэ болҕомто киинигэр турбута. Саас-сааһынан сааһыланан үлэ программаларынан аттарыллан тэриллибитэ, сылын аайы түмүктэри биэрэн испитэ.

«Түмсүү» сынньалаҥ киинэ 2001 сылтан 5 сыллаах «Сынньалаҥ киинэ – духовнай сайдыы киинэ» программатынан үлэлээбитэ. 1999-2000 сылларга директор Павлова Наталья Семеновна «Мин дэриэбинэм – мин дьылҕам» диэн патриотическай пропаганда оҥорор, кулуубу өрө көтөҕөр сыалтан элбэх акцияны, марафону ыытан капитальнай ремонт оҥорбуттара.

Дьахталлар «Иэйии» вокальнай ансамбллара 2002 сыллаахха тэриллибитэ. Бу сыл 2002 сыл кулууп дьиэтин муостата уларытыллыбыта, ис көстүүтүн тупсарыыга капитальнай ремонт ыытыл­лан, дизайн, эстетика хайысханан саҥалыы тыыннанан оҥоhуллубута. 2003 сыл кулууп фойетын дизайна ситэриллибитэ. 2004 сыл кулууп тас обшивката оҥоhуллубута. 2005 сыллаах­ха «Алгыс» ветераннар түмсүүлэринэн ырыа, үҥкүү ансамбллара тэриллибитэ, материальнай-техническэй базатын бөҕөргөтүүгэ былааннаах үлэ ыытыллыбыта.

2004 сыллаахха «Архитектура, эстетика, дизайн обьекта учреждения культуры в современных условиях» бастакы Президент М.Е.Николаев Гранын (100000 тыһ.) улууска аан бастаан ылбыппыт. Бырайыак автора – Наталья Павлова. 2006 сыллаахха Майаҕастааҕы «Түмсүү» сынньалаҥ киинэ «Развитие высоких технологий в сфере развития в современной инфраструктуре досуговых услуг и отдыха, общения населения в сельской местности», автор – Павлова Н.С.

2006 сыллаахха «Түмсүү» СК «Юридическое лицо» аатын ылбыта. Бу сыл улууспут нэһилиэктэрин икки ардыларыгар ыытыллыбыт «Төрөөбүт нэһилиэгим дьылҕата – мин дьылҕабар» көрүү-эстафетаҕа сертификатынан бэлиэтэммиттэрэ. 2007 сыл директор Наталья Семеновна  салалтатынан «Түмсүү» СК методиhа Сыроватскай Матвей Васильевич «Создание клуба-интернет в сельской местности» анал бырайыагынан, 100 000 (сүүс тыһыынча) солкуобайдаах граҥҥа тиксибитэ.

2009 сыллаахха директор Кычкина Валентина Валентиновна. «Олоҥхо биhигэ – Уус-Алдан» улуустааҕы фольклорнай эстафета-фестивальга нэһилиэк уус-уран самодеятельноһа 1 миэстэни ылары ситиhэн, 25000 солк. тыһ. бириискэ тиксибитэ. 2010 сыллаахха 500000 солк. тыһ. суумалаах капитальнай ремонт ыытыллан: ититэр система саҥардыллыбыта, кулууп крышата бүтүннүү уларытыллыбыта, тас истиэнэтэ аныгы материалларынан бүрүллүбүтэ.

2011 сыллаахха директор Басыгысова Ирина Анатольевна. «Түмсүү» сынньалаҥ кииниттэн «Түмсүү» норуот айымньытын киинигэр уларыйбыта. «Түмсүү» НАК методиhа Кычкина Валентина Валентиновна В.А.Протодьяконов-Кулантай 100 сааhыгар ананар «Олох далааныгар» театрализованнай представление бырайыагынан улууска 2 миэстэ буолан, 50000 солк. тыһ. суумалаах граҥҥа тиксибитэ. 2012 сыллаахха 150000 солк. тыһ. суумалаах музыкальнай аппаратура ылыллыбыта.

2013-2019 сс. директор – Иванова Эльза Михайловна. Улуустааҕы «Өйдүүбүт, сүгүрүйэбит, махтанабыт!», «Спорт уонна культура нэһилиэнньэҕэ» фестивальга спорт, быыстапка секциятыгар 1 миэстэ, кэнсиэргэ 3 миэстэ буолан, зональнай көрүү түмүгүнэн 1 миэстэ (кэнсиэр 2 миэс­тэ). Улуу Кыайыы 70 сылыгар «Сыдьаай» ырыа-үҥкүү ансамбла Санкт-Петербург куоракка «Танцующий мир» аан дойдутааҕы күрэххэ кыттан «Лауреат 1 степени» салайааччы, «Дьолуо» фольклорнай ансамбль Москва куоракка «Богатства России», «Единая Россия» аан дойдутааҕы күрэххэ кыттан «Гран При», «Лауреат 1 степени» буолбуттара, салайааччы – Илистярова Александра Егоровна.

2016 сыллаахха улууска, илин эҥэр улуустарын көрүүтүгэр бастаан, тохсунньу 15-17 күннэригэр Дьокуускайга ыытыллыбыт «Культура уонна спорт – нэһилиэнньэҕэ» республикатааҕы  эстафета-фестивальга 1 миэстэ буолан, 500000 тыһ. солк. суумалаах бириискэ тиксибитэ.

2017 сыллаахха Дьокуускай куоракка «Алгыс» ветераннар үҥкүүһүттэрин ансамбла республикатааҕы «Зимний бал Мозайки» бальнай үҥкүү конкурсугар 3 степеннээх дипломант буолбуттара.

“Түмсүү” норуот айымньытын киинэ республикатааҕы субсидия бырайыагар кыттан, 619000 тыһ. солк. сууманы өрөмүөҥҥэ көрүллэрин ситиспитэ.

Өр сылларга нэһилиэк уус-уран самодеятельноьын кыттыылахтара, сынньалаҥ киин активистара киллэрбит кылааттара муҥура суох улахан.

Норуот айымньытын киинэ бүгүҥҥү күҥҥэ

Майаҕастааҕы “Түмсүү” сынньалаҥ киинэ норуот айымньытын киинин аатын ылан 2006 сылтан үлэлиир. Уопсайа 8 үлэһиттээх,ол иһигэр 5 идэлээх үлэһит үлэлиир. 2019 сылтан директорынан Сивцева Ольга Васильевна ананан үлэтин саҕалаабыта. Художественнай салайааччынан хаһыс да сылын үлэлиир хореограф идэлээх Петров Григорий Иванович, аккомпониаторынан Саха өрөспүүбүлүкэтин культуратын туйгуна Иванов Константин Семенович өр сылларга утумнаахтык үлэлээн кэллэ. Ону таһынан эдэр ыччаттарбыт Ноговицына Мария Валерьевна специалиһинэн, Троева Евдокия Анатольевна методиһынан, Крылов Андрей Иннокентьевич оформителинэн үлэлии сылдьаллар.

“Түмсүү” норуот айыымньытын киинин иһинэн элбэх куруһуоктар, түмсүүлэр үлэлииллэр. Олор истэригэр киэн тутта ааттыыбыт “Алгыс” бэтэрээннэр түмсүүлэрин салайааччы Дмитрий Дмитриевич Курилкин, ытыыны таптааччылар түмсүүлэрин салайааччы Прокопий Николаевич Трулин, “Сардаҥа” ийэлэр түмсүүлэрин иһинэн үлэлиир куруһуоктары салайааччы Ноговицына Мария Валерьевна, биллиард, теннис куруһуоктара тэтимнээхтик үлэлииллэр

“Түмсүү” норуот айымньытын киинин үлэһиттэрэ, култуурунай-сырдатар үлэни ыытыы, нэһилиэнньэ сынньаланын тэрийии диэн сыаллаах нэһилиэккэ араас хабааннаах тэрээһиннэри ыытан, улуус тэрийэр тэрээһиннэригэр көхтөөхтүк кыттан үлэлиир.

2019 сыл түмүгүнэн норуот айымньытын киинин үлэһиттэрэ ситиһиилээхтэр. Онтон биир улахан ситиһиибит аккомпониатор Константин Семенович Иванов “Улууска культуура сайдыытыгар киллэрбит кылаатын иһин” знагынан наҕараадаламмыта, ону тэҥэ методист Троева Евдокия Анатольевна Уус-Алдан улууһун культуратын “Бастыҥ методист ”аатын ылары ситиспитэ.

Олунньу 27 күнүгэр 2020 с. «Уус-Алдан уран уустарын түһүлгэтэ» улуустааҕы быыстапка-дьаарбаҥкаҕа биһиги нэһилиэк­пититтэн талааннаах дьоммут кыттан кэллилэр. Түмүккэ Семен Семенович Петров «Уран Уус» көрүҥҥэ» 1 миэстэҕэ, «Киэргэл, симэх оҥорор норуот талааннаахтара» дефиле күрэҕэр 3 үр­дэлгэ Екатерина Петровна Ушницкая, «Кыл, сиэл алыба» көрүҥҥэ «Дьөһөгөй бэлэҕэ» анал аат Людмила Петровна Черноградскаяҕа тигистэ. Нэһилиэкпит дьоҕурдаах дьонун эҕэрдэлиибит уонна махталбытын тиэрдэбит.

Сэбиэдиссэйдэринэн, директордарынан үлэлээбиттэрэ:

1950 с. – Аммосов Макар Гаврильевич;

1956 с. – Колодезников Петр Иванович;

1959 с. – Федоров Фред Михайлович

1962 с. – Новогодин Лаврентий Иванович;

1966 с. – Бурцев Данил Данилович

1972 с. – Готовцев Василий Давыдович;

1973 с. – Егорова Варвара Романовна;

1975 с. – Куличкина Анна Афанасьевна;

1979 с. – Павлова Наталья Семеновна;

1984 с. – Иванов Константин Семенович;

1986 с. – Аммосова Парасковья Петровна;

1987 с. – Петрова Валентина Николаевна;

1988 с. – Макаров Иннокентий Иннокентьевич;

1988 с. — Слепцова Александра Александровна;

1989 с. – Пухова Оксана Гаврильевна;

1990 с. – Афанасьева Альбина Егоровна;

1995 с. – Неустроева Кюннэй Афанасьевна;

1996 с. – Трулина Мария Николаевна;

1997 с. – Аммосов Павел Петрович;

1998 с. – Старкова Изабелла Михайловна;

1999 с. – Павлова Наталья Семеновна;

2008 с. – Кычкина Валентина Валентиновна;

2011 с. – Басыгысова Ирина Анатольевна;

2012-2019 сс. – Иванова Эльза Михайловна;

2019с. – Сивцева Ольга Васильевна.

Саха республикатын үтүөлээх артыыстара:

1. Петрова Парасковья Ивановна – 1955 с.
2. Акимова Акулина Николаевна – 2003 с.
3. Аммосов Семен Иванович – 2013 с.

Саха республикатын культуратын туйгуннара:

1. Аммосов Семен Иванович-2002с.
2. Акимова Акулина Николаевна – 2003с.
3. Иванов Константин Семенович – 2002с.
4. Павлова Наталья Семеновна – 2002с.
5. Петров Петр Семенович – 2002с.
6. Дохунаева Лена Егоровна – 2008с.
7. Копырина Ия Николаевна — 20
8. Копырина Розалия Николаевна – 2016с.
9. Кириллина Ксения Николаевна – 2017с.

Саха республикатын норуотун маастардара:

1. Курилкина Анна Прокопьевна
2. Копырин Гаврил Антонович – 2009 с.
3. Никитина Мария Егоровна – 2017 с.
4. Петрова Мария Егоровна – 2017 с.
5. Петров Семен Семенович 1 – 2017 с.
6. Иванов Григорий Михайлович – 2007 с.
7. Ховров Анатолий Иванович.

Уус Алдан улууhун культуратын сайдыытыгар киллэрбит

кылааттарын иhин үрүҥ көмүс бэлиэлээхтэр:

1. Иванова Матрена Афанасьевна – 2011 с.;
2. Петрова Роберта Михайловна – 2016 с.;
3. Готовцева Анна Романовна – 2015 с.;
4. Павлов Степан Степанович – 2016 с.;
5. Петрова Октябрина Ивановна – 2016 с.;
6. Петров Петр Семенович – 2015 с.;
7. Акимова Акулина Николаевна – 2017 с.;
8. Бурцева Людмила Архиповна – 2015 с.;
9. Бурцев Афанасий Петрович – 2017 с.;
10. Эверстова Татьяна Егоровна – 2017 с.;
11. Трулин Прокопий Николаевич – 2018 с.;
12. Стручкова Матрена Никоновна – 2018 с.;
13. Петрова Людмила Михайловна – 2018 с.;
14. Курилкин Дмитрий Дмитриевич – 2018 с.;
15. Копырина Анастасия Николаевна – 2019 с.;
16. Костромина Раиса Николаевна – 2019 с.;
17. Стручкова Елена Гаврильевна – 2019 с.;
18. Кычкин Ким Кимович – 2019 с.;
19. Скороходкина Антонина Николаевна – 2019 с.;
20. Иванов Константин Семенович – 2020 с.