Сэтинньи 15 күнүгэр Хоро нэһилиэгэр Майаҕастааҕы «Түмсүү» норуот айымньытын киинигэр ССРС суруйааччыларын сойууһун чилиэнэ, СР бөдөҥ судаарыстыбаннай, уопсастыбаннай, бэлитиичэскэй диэйэтэлэ, П.А. Ойуунускай уонна Эрилик Эристиин аатынан судаарыстыбаннай бириэмийэлэр лауреаттара, РСФСР, Саха АССР култуурытын үтүөлээх үлэһитэ, Дьокуускай куорат уонна Уус Алдан улууһун Бочуоттаах олохтооҕо Василий Андреевич Протодьяконов – Кулантай төрөөбүтэ 110 сылын бэлиэтиир «Олох далааныгар» ахтыы киэһэтэ буолан ааста!
Тэрээһини Кулантай аатынан Чараҥнааҕы литературнай музей салайааччыта Клара Анатольевна Крылова «Норуокка анаммыт дьоһун олох» быыстапканан саҕалаата. Василий Андреевич өрөспүүбүлүкэ туһугар оҥорбут үтүөлэрин, киһи, суруйааччы, музей дириэктэрин быһыытынан үлэтин ахтан-санаан ааста.
Ону таһынан, Василий Андреевич Протодьяконов — Кулантай биэс оонньуулаах, аҕыс хартыыналаах, эпилогтаах туруоруллан киэҥ сэҥээриини ылбыт “Манчаары” драматыттан быһа тардыыны Майаҕас орто оскуолатын кэллэктиибин толоруутугар астына-дуоһуйа көрдүбүт.
Бу киэһэ ыалдьыттаан аастылар Кулантай бииргэ төрөөбүт убайын Иван Андреевич Протодьяконов иккис кыыһа, Уус Алдан улууһун Суотту нэһилиэгин олохтооҕо, үлэ, сцена ветерана, сэрии кэмин оҕото Евдокия Ивановна Бурнашева кыыһынаан Наталия Васильевна Бурцевалыын. Наталия Васильевна — Василий Васильевич Алексеев аатынан Мүрүтээҕи уолаттар гимназияларыгар саха тылын, литературатын учуутала, СР үөрэҕириитин туйгуна, РФ уопсай үөрэҕин тиһигин бочуоттаах үлэһитэ, Бэрт Ууһун нэһилиэгин бочуоттаах олохтооҕо, филологическай наука кандидата.
Улуустааҕы дьокутааттар сэбиэттэрин бэрэссэдээтэлэ Иван Иванович Колодезников, Уус Алдан үөрэх управлениетын иитэр үлэҕэ салаа салайааччыта Мираида Михайловна Стрекаловская, Уус Алдан улууһун үп управлениетын кэллэктиибин профсойууһун аатыттан Люция Власьевна Аммосова, Хоро нэһилиэгин баһылыга А.А. Ушницкай, Майаҕас орто оскуолатын дириэктэрэ Семен Васильевич Аргунов истиҥник эҕэрдэлээтилэр, бочуотунай кырааматалары, махтал суруктары, түөскэ иилиниллэр анал бэлиэлэри, бэлэхтэри үөрүү-көтүү доҕуһуолугар туттардылар.
Саха норуотун чаҕылхай дьонноруттан биирдэстэрэ Василий Андреевич Протодьяконов – Кулантай олоҕо, айымньылаах үлэтэ, дьулуспут дьулуура барыбытыгар кэрэҕэ угуйар үтүө холобур буолар.
Василий Андреевич Протодьяконов – Кулантай аата хаһан да умнуллуо суоҕа, төрөөбүт литературатын, дьону – сэргэни уонна олоҕу таптыыр саха киһитин сүрэҕэр кини ытык – мааны аата үйэлэртэн – үйэлэргэ ааттана туруоҕа!
"Норуокка анаммыт дьоһун олох" быыстапка
