Бүгүн, муус устар 10 күнүгэр Хоро нэһилиэгэр «Сандал сааһы уруйдуох» сүргэни көтөҕөр, сүрэҕи үөрүүнэн толорор, сааскы сылаас, ылааҥы күннэр үүммүттэринэн көр-күлүү оонньуулаах, сүүрүүлээх-көтүүлээх күрэхтэрдээх унньуктаах уһун, кырыа кыһыны атаарар үөрүүлээх тэрээһин «Саллаат» күөлүгэр буолан ааста.
Тэрээһин сүрүн күрэҕинэн Саха Өрөспүүбүлүкэтигэр Аҕа уонна Булчут күннэригэр аналлаах, нэһилиэк түөлбэлэрин эр дьонун икки ардыларыгар ыытыллар “Эр киһи, эр хоһуун” күрэх буолла. Уопсайа 4түү эр киһиттэн турар 2 хамаанда «Дьулуур» түөлбэ уонна «Сарыал» түөлбэ хамаандалара 4 түһүмэххэ илин-кэлин түһүстүлэр. Күрэх бастакы түһүмэҕэ кутаа уоту оттон уу оргутуута, манна «Дьулуур» хамаандата 12 мүн. 38 сөк. оргутан эрэллээхтик кыайда. Иккис түһүмэх 4 этаптан турар эстэпиэтэ. Рюкзахтаах, батарантаастаах, аптамаат саа сүгүүлээх тоҥуу хаарынан сүүрүү, биир дүлүҥү 8 гына хайытыы, 15тээх 4 устуука тоһоҕону саайыы уонна салгын саатынан 5 кубигы табыы, бу көрүҥҥэ «Сарыал» хамаандата кыайыылааҕынан таҕыста. Үһүс түһүмэхэ ыһыылаах-хаһыылаах канат тардыһыытыгар «Дьулуур» хамаандата кыайда. Төрдүс түһүмэх «Хомуур хапсаҕай», түөрт түөрткэ утары көрсүүгэ «Сарыал» хамаандата кыайыылаах буолла. 4 түһүмэх түмүгүнэн 2лии очукуону ыллылар, күрэх балаһыанньатыгар олоҕуран эстэпиэтэҕэ кыайыылаах «Сарыал» түөлбэ хамаандата кыайыылааҕынан таҕыста. Кыайыылаах «Сарыал» хамаандаҕа булт-алт «Сиэгэн» маҕаһыыныттан биирдии бэйэлэригэр 2 тыһ. солк. сууммалаах сертификаттарынан, 2 миэстэлээх «Дьулуур» хамаандатыгар 1,500 тыһ. солк. суммалаах сертификаттарынан мэтээллэринэн наҕараадаланнылар. Ону таһынан эстэпиэтэ көрүҥнэригэр бастыҥ көрдөрүүлээхтэр анал номинацияларга тигистилэр, ол курдук, «Бастыҥ хапсаҕайдьыт эр бэрдэ» — Сергей Гуляев, «Бастыҥ бэргэн эр бэрдэ» — Виктор Аммосов, «Бастыҥ күүстээх эр бэрдэ» — Сергей Мигалкин, «Бастыҥ сымса туттуулаах эр бэрдэ» — Иннокентий Крылов буоллулар уонна нэһилиэк урбаанньыттара туруорбут бириистэрин бэлэх туттулар.
Түгэнинэн туһанан тэрээһиммитин ыытарга күүс-көмө буолбут Хоро нэһилиэгин урбаанньыттарыгар ИП Костромин Н.Е., ИП Мигалкина Н.Г., ИП Копырин П.П., ИП Троев Г.А., ИП Васильева М.П., олохтоох Хоро нэһилиэгин дьаһалтатыгар, кэлбит ыалдьыттарга, күрэхтэһээччилэргэ оллооҥҥо итии күөс буһарыгар куһунан күндүлээбит Скороходкин А.Д. Майаҕастааҕы «Түмсүү» НАК ааттыттан барҕа махталбытын биллэрэбит! Бука бары доруобай, үлэҕит-хамнаскыт таһаарыылаах буоллун!
