Бүгүн, кулун тутар 5 күнүгэр Майаҕастааҕы «Түмсүү» норуот айымньытын киинигэр Саха Өрөспүүбүлүкэтигэр «Култуура» сылын чэрчитинэн, үгэскэ кубулуйбут, Аан дойду кэрэ аҥардарын күнүгэр аналлаах алын сүһүөх үөрэнээччилэрин кэрэчээн кыргыттарын икки ардыларыгар «Күнчээнэ Куо — 2026» куонкурус буолан ааста. Күрэххэ уопсайа 6 кырачаан кыыс кыттыыны ылла. Куонкурус уопсайа 5 түһүмэҕинэн буолла, ол курдук: 1) бэйэни билиһиннэрии; 2) талба талаан; 3) фитнес — аэробика; 4) авангарднай муода; 5) Киэһээҥҥи мааны былааччыйа.
Дьүүллүүр сүбэ састааба: 1) Москвитина Виктория Михайловна — «Майаҕастааҕы 14 нүөмэрдээх оҕо уһуйаанын» музыкальнай салайааччыта; 2) Сивцева Ольга Васильевна — Майаҕастааҕы «Түмсүү» НАК дириэктэрэ; 3) Самсонова Надежда Александровна — Майаҕас орто оскуолатын иитэр үлэҕэ дириэктэри солбуйааччы; 4) Гоголева Динара — Майаҕас орто оскуолатын 11 кылааһын үөрэнээччитэ, улуустааҕы «Сааскылаана Куо» күрэх «Тыҥаайы» анал аат хаһаайката.
Кэрэчээн кыргыттарбыт күрэххэ анаан күүстээх үөрэх кэнниттэн, ох курдук оҥостон, кустук курдук куоһанан, көхтөөхтүк бэлэмнэнэн көрөөччүлэр иннилэригэр кимтэн кииннээхтэрин, хантан хааннаахтарын билиһиннэрдилэр, талааннарын, туохха дьоҕурдаахтарын, ураты араас матырыйаалтан оҥоһуллубут авангарднай сэлээппэлэрин көрдөрдүлэр, чөл олоҕу тутуһар, эти-хааны чэбдигирдэр аныгы спортивнай хамсаныылаах фитнес — аэробика үҥкүү тэптилэр, куба курдук нуоҕайа устан, кыталык курдук кынталдьыйан киирэн киэһээҥҥи мааны былааччыйаах хаамтылар.
Кэлэн иһэр сааскы маҥнайгы бырааһынньыгынан, Аан дойду кэрэ аҥардарын күнүнэн кэлбит көрөөччүлэри, күрэххэ кыттар кэрэчээн кыргыттары бэйэлэрин эҕэрдэ нүөмэрдэрин оҕо уһуйаанын иитиллээччилэрэ Эля Сивцева — «Мамочка моя» ырыатын, Мичийэ Власьева — «Ийэ күнэ» ырыатын, «Чуораанчык» оҕо уһуйаанын кырачаан оҕолоро «Оһуор» үҥкүүлэрин, 2 кылаас үөрэнээччилэрэ Арсений Аргунов, Эрсан Костромин дуэт — «Ийэ» ырыаларын, 5 кылаас үөрэнээччитэ Айтал Прокопьев — «Ийэ истиҥ мичээрэ» ырыатын, 3 кылаас үөрэнээччитэ Сайнаара Петрова — «Ковбойскай» үҥкүүтүн, 2-4 кылаас оҕолоро — «Орлята России», «С нами друг» уопсай ырыаларын, «Катюша» үҥкүүлэрин бэлэх ууннуулар. Күрэҕи көрө кэлбит хас биирдии кэрэ аҥарга, кыргыттарга, ийэлэргэ, эбээлэргэ кэлэн иһэр Аан дойду кэрэ аҥардарын күнүнэн эҕэрдэлээн туран Майаҕас орто оскуолатын алын сүһүөх кылааһын уолаттара бэйэлэрэ оҥорбут минньигэс бэлэхтэрин бэлэх ууннулар.
Күрэх кыайыылааҕынан, «Күнчээнэ Куо — 2026» үрдүк ааты 3 кылаас үөрэнээччитэ Вика Кычкина ылла. «Сааскылаана Куо» — 3 кылаас үөрэнээччитэ Нарияна Копырина, «Кэрэчээнэ Куо» — 3 кылаас үөрэнээччитэ Снежанна Протодьяконова, «Мичийээнэ Куо» — 3 кылаас үөрэнээччитэ Нюргуяна Копырина, «Кэскилээнэ Куо» — 3 кылаас үөрэнээччитэ Айгылаана Тарабукина, «Туйгууна Куо» — 4 кылаас үөрэнээччитэ Сайаана Ушницкая буоллулар. Ону таһынан «Талба талаан — 2026» анал ааты 3 кылаас үөрэнээччитэ Нарияна Копырина ылла.
«Күнчээнэ Куо — 2026» күрэх үрдүк таһымнаахтык ааһарыгар күүс-көмө буолбут спонсордарга «Хоро нэһилиэгэ» тыа сирин түөлбэтин Аҕа баһылыгар А.А. Ушницкайга, Майаҕастааҕы «Түмсүү» НАК дириэктэригэр О.В. Сивцеваҕа, В.А. Протодьяконов — Кулантай аатынынан Майаҕастааҕы орто оскуола дириэктэригэр С.В. Аргуновка, ООО «Север Трак» дириэктэригэр Г.А. Троевка, ИП «Н.Е. Костромиҥҥа» тэрийээччилэр уонна кыттааччылар ааттарыттан барҕа махтал тылларын тиэрдэбит!
Кэрэчээн кыргыттарбытыгар баҕарабыт дьоллоох оҕо сааһы, үрдүктэн-үрдүк ситиһиилэри, инники олоххутугар үрдүк дабайыылары, сааскы чаҕылхай күн курдук өссө тупса, чэчирии, үүнэ-сайда турун! Күндү көрөөччүлэрбит эһиэхэ күннээҕи түбүгү аахсыбакка биһиги тэрээһиммитин кэлэн көрбүккүтүгэр, сылаас ытыскыт тыаһын бэлэхтээбиккитигэр ис сурэхтэн махтанабыт, дьоммут барахсаттар куруук уөрэ-көтө этэҥҥэ сылдьын!
