Муус устар 27 күнэ саха норуотун историятыгар ураты суолталаах бэлиэ күн. 1922 сыллаахха бу күн саха норуотун чулуу уолаттара Былатыан Ойуунускай, Максим Аммосов, Исидор Барахов Саха сирэ автономия буоларын ситиспиттэрэ. Ол саха омуга сайдыытыгар улахан төһүү күүс, бигэ тирэх буолбута. Бу уһулуччу сүдү суолталаах бэлиэ күҥҥэ Василий Андреевич Протодьяконов-Кулантай аатынан Майаҕас орто оскуолатын үөрэнээччилэригэр «Толкуйдаа, оонньоо, кыай!» диэн күрэх оонньуу ыытылынна.
Оҕолор үс хамаандаҕа арахсан боппуруостарга эппиэттээн илин — кэлин түһүстүлэр. Хамаандалар бары да саха тылын, суругун — бичигин, саха суруйааччыларын үчүгэйдик билэллэрин дакаастаатылар.
Түмүккэ «Сибэккилэр» хамаандата (Амелия Протодьяконова, Динара Гоголева, Сайаана Свинобоева, Илона Степанова, Күнэйэ Сивцева, Алгыс васильев) бастакы миэстэни ылары ситистилэр. Иккис миэстэни «Күн сардаҥалара» хамаанда (Анжелина Бурцева, Милена Власьева, Сахалина Сивцева, Лина Заболоцкая, Сияна Слепцова) ылан үөрүү өрөгөйүн биллилэр. Үһүс бириистээх миэстэҕэ «Саха сирэ» (Кыыма Самсонова, Нарыйаана Стрекаловская, Долун Аргунов, Настя Протодьяконова, Милана Скороходкина) таҕыста.
Сахабыт тыла-өһө, суруга-бичигэ симэлийэн сүппэххэ көлүөнэттэн көлүөнэҕэ бэриллэн салгыы сайдар саҕахтаннын диэн туран, кыттыыны ылбыт оҕолорбутугар махтанабыт, куруук да маннык көхтөөх буолуҥ.
