06.03.2020
Кулун тутар 6 күнүгэр Хоро нэһилиэгэр Аан дойду дьахталларын күнүн көрсө «ИС СҮРЭХТЭН» кэнсиэр буолла.
Бу биэчэргэ кэлбит бары кэрэ аҥардарга олохтоох дьаһалта эр дьоно уонна нэһилиэк депутаттара сибэкки дьөрбөтүн бэлэх ууннулар.
Кэнсиэри ылбаҕай ырыалар, тэтимнээх үҥкүүлэр, сценкалар, фотозоналар киэргэттилэр. Ону таһынан «Түмсүү» НАК иһинэн үлэлиир «Сардаана» куруһуок кыттааччылара бэйэлэрэ оҥорон таһаарбыт араас дьэрэкээн сумкалары, декоративнай макраметтан паннолары, сибэкки иһиттэрин, авоська-сумкалары, баайыы бэргэһэлэри, снудтары дьон-аймах иннитигэр таһааран көрдөрдүлэр.
Түмүккэ киирии билиэтинэн араас сыаналаах, кэрэ аҥардарга туһалаах бириистэр оонньоннулар. Сүрүн бирииһи — электромясорубканы Милана Скороходкина сүүйдэ.
