Бэҕэһээ, олунньу 22 күнүгэр Майаҕастааҕы «Түмсүү» норуот айымньытын киинигэр дуобат көрүҥэр спорт маастарыгар кандидатын, Хоро нэһилиэгин Бочуоттаах олохтооҕун, Үлэ бэтэрээнин, Уус-Алдан улууһун култууратын сайдыытыгар кылаатын иһин бэлиэ хаһаайынын Петр Васильевич Иванов 75-с юбилейнай сааһыгар аналлаах нэһилиэк иһинээҕи “Дуобат” турнирын күрэҕэ буолан ааста.
Петр Васильевич 1950 сыллаахха, сэтинньи 18 күнүгэр, Майаҕас бөһүөлэгэр, Василий Константинович уонна Анастасия Васильевна Ивановтар дьиэ кэргэттэригэр күн сирин көрбүтэ. Ойон тахсар күннээх, ойор-тэбэр оҕо сааһа төрөөбүт Майаҕаһыгар ааспыта. 1967 сыллаахха, оскуоланы бүтэрэн “Маяк” колхозка үлэҕэ киирэн, 1972 сылтан улахан массыыналарга суоппарынан, тракториһынан, “Сельхозтехника” тэрилтэҕэ маастар-наладчигынан, Майаҕас орто оскуолатыгар производстеннай маастарынан, олохтоох Олох дьаһах уонна коммунальнай хаһаайыстыба тэрилтэтигэр маастарынан, начальнигынан, “Мелиоводхоз” тэрилтэҕэ линейнай сулууспа ремононтник-монтажнигынан үтүө суобастаахтык үлэлээн, бочуоттаах сынньалаҥҥа тахсан, үлэ бэтэрээнэ буолбута.
Петр Васильевич олоҕор дуобакка оонньооһуна 1989 сыллаахтан саҕаламмыта. Ол кэмҥэ, Хоро сэбиэтин бэрэссэдээтэлинэн үлэлээбит Румянцев Степан Ильичтыын дуобакка оонньоон, бу көрүҥү сөбүлээн, баһылаан, онтон ылата нэһилиэк иһинэн ыытыллар күрэхтэргэ кыттыыны ылар буолбута.
1998 сыллаахха улууска нэһилиэктэр икки ардыларынааҕы бастыыр иһин күрэххэ 2 миэстэни, 2006 сыллаахха Өрөспүүбүлэкэтээҕи “Урожай” 50 сылллаах юбилейнай күрэҕэр 3 миэстэни ылаттыыр. Ити кыайыыларынан кынаттанан нэһилиэккэ, улууска дуобат күрэхтэригэр, спартакиадаларыгар нэһилиэк бэтэрээннэрин, инбэлииттэр түмсүүлэрин, үөрэх салаатын үлэһиттэрин чиэстэрин көмүскээн, хас да төгүллээх кыайыылаҕа, кыттыылаҕа.
1990-с сылларга Петр Васильевич Майаҕас орто оскуолатыгар трактороведения уруогун учууталынан үлэлии киирэн баран Николай Герасимович Жирковтуун оҕолору дуобакка дьарыктаан саҕалаабыттара. Үөрэнээччилэрэ дьарыгы үчүгэйдик ылынан нэһилиэк, улуус, өрөспүүбүлүкэ күрэхтэригэр элбэхтик оскуола, нэһилиэк чиэһин көмүскээн кыайыыны-хотууну аҕалбыттара.
Петр Васильевич 2011 сыллаахха дуобакка I разряды ылар, онтон 2013 сыллаахха дуобат көрүҥэр спорт маастарыгар кандидат нуорматын толорор.
Петр Васильевич эдэр сааһыттан бэйэтин баҕатынан, дьоннор байаанҥа хайдах оонньуулларын көрөн үөрэнэн, күн бүгүнҥээҥҥи диэри байаан тыыннаах доҕуһуолугар уйдаран оонньуур. Аҥардас дуобакка эрэ буолбакка саахымака, нэһилиэк култууратын, общественнай олоҕор куруутун инники сылдьар биир тутаах көхтөөх кыттааччыбыт, ытыктыыр бэтэрээммит буолар. Майаҕастааҕы “Түмсүү” НАК иһинэн ыытыллар “Ыллык” эр дьонун ырыа ансаамбылын кыттыылааҕа.
Петр Васильевич олоҕун аргыһынаан Людмила Михайловналыын ыал буолан өйөһөн-өйдөһөн бииргэ олорбуттар 52 сыла. Кинилэр 7 оҕо, 21 сиэн, 1 хос сиэн тапталлаах эбэлэрэ, эһэлэрэ.
Турнир үөрүүлээх арыллыытыгар Петр Васильевич төрөппүт оҕолоро, сиэннэрэ, олоҕун аргыһа Л.М. Иванова, Хоро нэһилиэгин аҕа баһылыга А.А. Ушницкай, Майаҕастааҕы «Түмсүү» НАК дириэктэрэ О.В. Сивцева, үөлээннэхтэрэ «Ыллык» эр дьон вокальнай ансаамбылын кыттыылаахтара, Уус Алдан улууһун доруобуйаларыгар хааччахтаах дьон түмсүүлэрин салайааччыта Д.В. Аммосов, аймахтара В.С. Иванов, С.С. Иванов, К.С. Иванов эҕэрдэ тыл бастыҥын анаатылар, сэмэй бэлэхтэрин туттардылар.
Дуобат турнирын түмүгүнэн кыайыылаахтар:
Оҕолор: Уолаттар: 1м. Егор Оконешников; 2м. Максим Аргунов; 3м. Эрхан Кпырин, 3м. Албан Иванов. Кыргыттар: 1м. Күнэйэ Сивцева; 2м. Нарыйаана Стрекаловская; 3м. Сайаана Ушницкая; 3м. Сандаара Ушницкая.
Улахан дьон: Кэрэ аҥардар: 1м. Сардаана Кузьмина; 2м. Мария Аммосова; 3м. Людмила Иванова; 3м. Лариса Скороходкина. Эр дьон: 1м. Дмитрий Аммосов; 2м. Михаил Иванов; 3м. Илья Скороходкин; 3м. Григорий Охлопков буоллулар. Ону таһынан күрэх кыттыылаахтарыгар Петр Васильевич дьиэ кэргэнин аатыттан элбэх номинациялары, бириистэри туттаран кэлбит спортсменнар үөрүүлэрэ муҥура суох буолла.
