Хоро нэһилиэгэр тохсунньу ый 14 күнүгэр үгэскэ кубулуйбут, сылын аайы ыытыллар, «Сыл бастыҥнара» 2025 сыл түмүгүнэн бастыҥ көрдөрүүлээх үлэлээх, үрдүк ситиһиилээх активистарга, общественниктарга, спортсменнарга аналлаах бырааһынньыктааҕы үөрүүлээх тэрээһин ону тэҥэ «Сыл арыйыыта» эҕэрдэ кэнсиэр буолан ааста.
Бу киэһэ ыҥырыылаах ыалдьыттар, көрөөччүлэр то5уоруһан, өрө-көтө5үүлээхтик, чахчы да бырааһынньыктыы тэрээһиннээхтик барда. Хоро нэһилиэгин Аҕа баһылыга А.А. Ущницкай саҥа үүммүт 2026 сылынан эҕэрдэлээтэ уонна үөрүүлээх быһыыга-майгыга наҕараадаламмыт дьоҥҥо аалай лиэнтэни кэтэттэ, статуэткалары уонна эҕэрдэ суруктары туттарда. Ол курдук 2025 сыл түмүгүнэн анал ааттары ыллылар:
“СЫЛ БАСТЫҤ УЧУУТАЛА” — Мария Михайловна Прокопьева.
“СЫЛ БАСТЫҤ УҺУЙААН ҮЛЭҺИТЭ” – Элеонора Михайловна Слепцова.
“СЫЛ БАСТЫҤ ОЛОХТООХ ДЬАҺАЛТА ҮЛЭҺИТЭ” — Евдокия Юрьевна Гуляева.
“СЫЛ БАСТЫҤ КУЛЬТУРА ҮЛЭҺИТЭ” – Андрей Иннокентьевич Крылов.
“СЫЛ БАСТЫҤ ЖКХ ҮЛЭҺИТЭ” – Михаил Кононович Щелковников.
“СЫЛ БАСТЫҤ СПОРТСМЕНА” – Владимир Николаевич Орлов.
“СЫЛ БАСТЫҤ ОБЩЕСТВЕННИГА” – Юрий Кимович Кычкин.
“ТЫА ХАҺААЙЫСТЫБАТЫГАР БАСТЫҤ КӨРДӨРҮҮЛЭЭХ ЫАЛ” — Светлана Николаевна, Прокопий Николаевич Трулиннар.
“БАСТЫҤ КӨРДӨРҮҮЛЭЭХ УРБААННЬЫТ” – Дмитрий Михайлович Охлопков.
“СЫЛ БАСТЫҤ ААҔААЧЧЫТА” – Марина Романовна Копырина.
2025 сылга саҥа алаһа дьиэни туттан киирбит Ангелина Мичил, Сергей Юрьевич Гуляевтар дьиэ кэргэҥҥэ олохтоох дьаһалта аатыттан эҕэрдэ суругу, сэмэй бэлэҕи туттарда.
Ону таһынан Майаҕастааҕы «Түмсүү» норуот айымньытын киинин дириэктэрэ О.В. Сивцева 2025 сыл түмүгүнэн «СЫЛ БАСТЫҤ КУЛЬТУРА АКТИВИҺА» анал ааты Сахаян Михайлович Ивановка, «СЫЛ БАСТЫҤ КУЛЬТУРА КӨХТӨӨХ ДЬИЭ КЭРГЭНЭ» анал ааты Сардана Павловна, Дмитрий Дмитриевич Андросовтар дьиэ кэргэҥҥэ туттарда.
Ааспыт 2025 сыл Улуу Кыайыы 80 сылыгар ананан Хоро нэһилиэгэр элбэх, араас хабааннаах үлэлэр ыытылыннылар. Олортон биирдэстэрэ, 80 саастаах ытык кырдьаҕас, сэрии кэмин оҕото, инбэлиит, үлэ, уус-уран самодеятельность бэтэрээнэ Антонина Николаевна Скороходкина олорор дьиэтигэр киинтэн ититиллэр ситими сүүрэн-көтөн, туруорсан, материалын булан киллэттэрбиттэрэ буолар. Сэрии кэмин оҕото, Антонина Николаевна Скороходкина оҕолоро, сиэннэрэ, хос сиэннэрэ, хос–хос сиэнэ истиҥ эҕэрдэлэрин, дириҥ махталларын биллэрэн туран нэһилиэк Аҕа баһылыгар Алексей Алексеевич Ущницкайга Махтал суруктарын уонна сэмэй бэлэхтэрин туттардылар.
Бу үүммүт сылга саҥалыы тыынынан салайтаран, биир санаанан түмсэммит, биир сомоҕо буолуоххайыҥ диэн ыҥырабыт. Арассыыйаҕа — норуоттарын сомоҕолоһууларын, Саха сиригэр – Култуура, Уус Алдан улууһугар – түмсүү уонна бииргэ үлэлээһин, Хоро нэһилиэгэр — доруобуйа уонна чэбдигирии сылларын чэрчитинэн ыытыллар үлэлэргэ өссө үрдүктэн үрдүк дабайыылар, ситиһиилэр кэлэ турдуннар!
Баҕарбыккыт барыта баар буола турдуҥ!
Туппуккут барыта тупсан истиҥ!
Санааҕыт сай ыраах көтө турдун!
Үлэҕит, үөрэххит чыпчаалларга харбастын!
Доруобуйаҕыт күнтэн-күн тупсан истин!
