Бүгүн биһиги нэһилиэкпитигэр, тыа сирин олохтоохторугар, үйэлээх нэһилиэк историятын кэпсиир Түмэл балаҕан арыллыытын үөрүүлээх тэрээһинэ буолла.
Саҥалыы саҥа дьиэни, уруйдаан-айхаллаан, сахалыы сиэри-туому тутуһан, Аал уоту оттон, сирбитин-уоппутун аһатан, алгыһынан арчылаан ытык-мааны алгысчыппыт Айаал Гаврильевич Аргунов алгыс түһэрдэ.
Саҥа Түмэл балаҕаҥҥа киирэр, үөрүүлээх чааһын арыйарга аалай кыһыл лиэнтэни Уус Алдан улууһун дьаһалтатын Аҕа баһылыга Василий Петрович Алексеев, Хоро нэһилиэгин тыа сирин түөлбэтин Аҕа баһылыга Алексей Алексеевич Ущницкай, Педагогическай үлэ Бэтэрээнэ Людмила Еремеевна Ушакова үөрүүлээх быһыыга-майгыга быстылар.
Уус Алдан улууһун дьаһалтатын Аҕа баһылыга Василий Петрович Алексеев Хоро нэһилиэгэр саҥа Түмэл балаҕан арыллыбытынан эҕэрдэлээн туран, Хоро нэһилиэгин тыа сирин түөлбэтин Аҕа баһылыгар Алексей Алексеевич Ущницкайга «Уус Алдан улууһун социальнай-экономическай сайдыытыгар киллэрбит кылаатын иһин» бэлиэни туттарда.
Түмэл балаҕан Майаҕаспыт олоҕун, үгэстэрин, тыыннаах историятын кэрэһитэ буолар, ол курдук «Хоро нэһилиэгин дьонун маллара-саллара», «Хоро нэһилиэгин историята», «Сэрии — мин дьиэ кэргэним дьылҕатыгар», «Хоро нэһилиэгин киэн туттар дьоно», «Төрөөбүт түөлбэм көтөрө-сүүрэрэ» диэн хайысхаларга, тус-туһунан хосторго араарылыннылар.
Нэһилиэкпит Түмэлэ элбэх баай малларынан туоларын, тупсарын туһугар, хас биирдии ыалдьыты үөрдэ турарыгар, бэйэлэрин баҕа санааларынан, кылааттарын киллэрдилэр олохтоох дьоммут-сэргэбит Дегтярева Галина Власьевна, Гоголев Сергей Александрович. Ону сэргэ, Константин Николаевич, Анна Прокопьевна, Анастасия Константиновна Бурнашевтар дьиэ кэргэттэрэ оҥорон хаалларбыт өйдөбүнньүк маллара.
