1991 сылтан алтынньы ыйга Аҕам саастаах дьоммут күнэ аан дойду таһымыгар бэлиэтэнэр. Муударай сааска тиийэн кэлбит ытык дьоммут, санныбар эмиэ биир сыл хаара эбиллэр диэн санньыаран олорбокко, үөлээннээхтэргитин кытары үөрэ-көтө көрсөр, анал күҥҥүт тосхойбутунан хоолдьуктаах бэйэбит хоҥкуйан, сүһүөхтээх бэйэбит сүгүрүйэн туран эҕэрдэлээтэхпит буолуохтун!
Алтынньы 9 күнүгэр Хоро тыа сирин түөлбэтигэр Майаҕастааҕы «Түмсүү» норуот айымньытын киинигэр «Эдэр саас ахтылҕана» диэн Аҕам саастаахтар декадаларын сабыллыытын үөрүүлээх чааһа буолан ааста.
Күндү, Аҕам саастаах дьоннорбутун бырааһынньыктааҕы киэһэҕэ, баян уонна саксафон тыыннаах доҕуһуолунан ыҥырыылаах ыалдьыттар Айыына Сивцева, Петр Копырин, Павел Охлопков, Константин Иванов эҕэрдэлээтилэр.
Күндү, ытыктыыр дьоммутун өссө төгүл ис сүрэхпититтэн Аан дойду үрдүнэн Аҕам саастаахтар күннэринэн эҕэрдэлиибит! Эһиги үтүө үгэстэри салҕаан уонна тэнитэн, Өрөспүүбүлүкэ, улуус, нэһилиэнньэ сайдыытыгар сыралаах үлэҕитинэн сүҥкэн кылааты киллэрбит үтүө өҥөлөөххүт! Төрөөбүт дойдугутугар тапталгыт, эрэлгит, итэҕэлгит уонна инникигэ эппиэтинэстээх сыһыаҥҥыт барыта үүнэр көлүөнэҕэ үтүө холобур буолар. Ыччат өй-санаа өттүнэн үүнэригэр олук уурар. Баҕарыбыт чэгиэн доруобуйаны, күүстээх санааны, көхтөөх уһун олоҕу! Чугас дьоҥҥут тапталлара, истиҥ сыһыаннара санааҕытын кынаттаатын!
