«Сиэгэнтэн эҕэрдэ»

Кулун тутар 15 күнүгэр Майаҕас бөһүөлэгэр Кэбээйи улууһун Сиэгэн Күөл нэһилиэгиттэн 13 киһилээх делегация ыалдьыттаан барда. Верхоян хайаларыттан айаннаан кэлбит ыалдьыттары Майаҕастааҕы «Түмсүү» норуот айымньытын киинин үлэһиттэрэ сахалыы сиэринэн арыылаах алаадьынан, кымыһынан «Тойон Мүрү» алаас «1941-1945» стеллатыгар айах тутан көрүстүлэр. Салҕыы кэлбит ыалдьыттары улууспут киинигэр баар саҥа тутуулары, В.В. Никифоров — Күлүмнүүр аатынан «Тойон Мүрү» култуура, Н.Н. Тарскай аатынан спорт дыбарыастарын, «Тойон Мүрү», «Майаҕас» айан суолун былаһааккаларыгар сылдьан улуус, нэһилиэк историятын кылгастык билиһиннэрдилэр. Ол кэннэ ыалдьыттар уонна Майаҕас олохтоохторо 2 тэҥ хамаандаҕа арахсан спорт араас көрүҥнэригэр илин-кэлин түһүстүлэр. Кэлбит ыалдьыттары кытта олохтоохтор араас үлэ эйгэлэригэр опыт атастастылар, СВОҕа сылдьар биир дойдулаахтарбытыгар туох-хайдах көмөлөр оҥоһуллалларын уо.д.а. тиэмэлэргэ кэпсэтиилэр буоллулар. Киэһэтигэр ыалдьыттар «Сиэгэнтэн эҕэрдэ» кэнсиэри бэлэх ууннулар.