Ыччат – олоҕу хамсатар күүс. Ол да иһин ханнык да улахан тэрээһин ыччат кыттыыта суох кыаллыбат. Кинилэр үүт-хайаҕас булан булбуттара-талбыттара, быыс-арыт көһүннэр эрэ, саҥаны, сонуну айбыттара-туппуттара эрэ баар буоллаҕа! Олоххо көхтөөх позициялаах, үтүө санаалаах, үлэттэн куотуммат, үөрэҕин таһынан үлэлиир, эбиитин уопсастыбаннай дьыаланан дьарыктанар ыччаты киһи эрэ хайгыы, киэн тутта көрөр буоллаҕа.
Ол курдук, тохсунньу 7 күнүгэр Ороһуоспа күнүн көрсө Хоро нэһилиэгин ырыа аргыстаах, үҥкүү доҕуһуоллаах «Эрэл» эдэр ыччат түмсүүтэ бырааһынньыктааҕы эҕэрдэ кэнсиэрин Майаҕас олохтоохторугар бэлэх уунна.
