Алтынньы 29 күнүгэр Майаҕастааҕы «Түмсүү» норуот айымньытын киинигэр «Эн, Комсомол, мин дьолум» тэрээһин буолан ааста. Бу тэрээһиҥҥэ нэһилиэкпит араас сыллардааҕы комсомолецтара уонна Мүрүтээҕи үһүс оскуола «Умсулҕан» түмсүү чилиэнэ А.М. Федорова кыттыыны ыллылар.
Ыччаты биир сыалга-сорукка түмэн, үлэни-хамнаһы дойду сайдыытыгар туһулаабыт комсомол тэрилтэтэ бэйэтин кэмигэр олус улахан суолталааҕа. Комсомол иҥэрбит үйэлээх сыаннастарын — төрөөбүт дойдуга тапталы, ытык иэһи, үлэһит буолууну, киһилии истиҥ сыһыаны, бэриниилээх буолууну бэйэлэрин дууһаларыгар, өйдөрүгэр-санааларыгар илдьэ сылдьар комсомол ииппит дьоно күн да бүгүн ыччат дьоҥҥо бэйэҕит олоххутунан өрүү бастыҥ холобур буола сылдьаҕыт.
«Комсомол — мин дьолум төлөнө» быыстапканы педагогическай үлэ бэтэрээнэ Марина Романовна Копырина уонна Мүрүтээҕи үһүс оскуола «Умсулҕан» түмсүүтүн чилиэнэ Анна Михайловна Федорова комсомол күүрээннээх кэмнэрин историятыттан быһа тардан, ахтан-санаан кэпсээтилэр.
Мустубут комсомолецтары икки хамаандаҕа арааран С.Г. Крылов аатынан модельнай библиотека сэбиэдиссэйэ К.Н. Кириллина «Өркөн өй» бииктэриинэ оонньотто. Кыайыылааҕынан «Кыһыл былаах» хамаанда таҕыста.
