Быйыл Улуу Кыайыы 78 сылын бэлиэтиир биһиги нэһилиэкпитигэр ыам ыйын 9 күнүгэр буолан ааста. Ол курдук, сарсыарда 10:00 чаастан Кыайыы болуоссатыгар мустан, үөрүүлээх миитиммит саҕаланна. Нэһилиэкпит аҕа баһылыга Алексей Алексеевич Ушницкий, педагогическай үлэ бэтэрээнэ Марина Романовна Копырина, Хоро нэһилиэгин бочуоттаах олохтооҕо Василий Петрович Бурцев, В.А. Протодьяконов-Кулантай аатынан Майаҕас орто оскуолатын профсойууһун бэрэссэдээтэлэ Маргарита Тимофеевна Попова уонна 14 нүөмэрдээх «Чуораанчык» оҕо уһуйаанын сэбиэдиссэй эбээһинэһин солбуйааччы Ирина Петровна Бурнашева эҕэрдэ тылларын эттилэр уонна тыыл бэтэрээнигэр Розалия Николаевна Васильеваҕа, сэрии сылын оҕолоругар: Октябрина Ивановна, Григорий Григорьевич I Петровтарга, Анна Романовна Готовцеваҕа, Анна Павловна Готовцеваҕа, Антонина Николаевна Скороходкинаҕа, Степан Степанович Павловка, бойобуой дьайыы бэтэрээннэригэр: Альберт Николаевич Васильевка, Василий Васильевич Бурцевка, Дмитрий Аркадьевич Крыловка, Украинаҕа буола турар анал байыаннай дьайыы кыттыылаахтарыгар: Иннокентий Николаевич Бурцевка, Коммунар Дмитриевич Крыловка, Сахаян Михайлович Ивановка, Николай Владимирович Ивановка өйдөбүнньүк бэлэхтэрин туттардылар.
Тэрээһин кэмигэр «Түмсүү» норуот айымньытын киинин үлэһит кыргыттара «Кыайыы алаадьытынан» уонна минньигэс «Саллаат хааһытын» буһаран ыалдьыттары күндүлээтилэр. Бу үөрүүлээх күнү киэргэттилэр: ылбаҕай ырыаларынан Ульяна Скороходкина, Константин Иванов, «Катюша» үҥкүүнэн «Күн бытархайдара» үҥкүү ансаамбыла, монтаж аахтылар В.А. Протодьяконов-Кулантай аатынан Майаҕас орто оскуолатын үөрэнээччилэрэ.
Ыам ыйын 9 күнэ Россия бары олохтоохторугар дириҥ өйдөбүллээх ытык күн буолар. Бу күн биһиги аан дойдуну фашизмтан босхолообут кыайыылаах көлүөнэҕэ дириҥ махталбытын биллэрэбит, кинилэргэ булгуруйбат санааларын уонна Ийэ дойдуларыгар тапталларын иһин сүгүрүйэбит.
