Олунньу 17 күнүгэр Майаҕастааҕы «Түмсүү» НАК дьиэтигэр В.А. Протодьяконов-Кулантай аатынан Майаҕас орто оскуолатын үөрэнээччилэрин «Кэнчээри ыччаты кэрэҕэ уһуйан» диэн, Улуу Кыайыы 80 сылыгар, Российскай Федерация, Саха АССР култууратын үтүөлээх үлэһитэ, Саха Өрөспүүбүлүкэтин култууратын үтүөлээх бэтэрээнэ, Найахы, Мүрү нэһилиэктэрин, Уус-Алдан улууһун Бочуоттаах олохтооҕо, «Кэнчээри» бастакы академическай оҕо хорун төрүттээччитэ В.С. Парников төрөөбүтэ 80 сылыгар аналлаах улуустааҕы үөрэнээччилэр уус-уран самодеятельностарын кэнсиэрэ буолан ааста.
Уопсайа кэнсиэргэ 66 оҕо кыттыыны ылла. Тэрээһини алын сүһүөх кылаас оҕолоро «День Победы» ырыанан арыйдылар, ол кэннэ, улахан кылаас оҕолоро күргүөмүнэн хорунан В.С. Парников мелодиятыгар Уус-Алдан гимнын, «Оҕолору харыстааҥ» ырыаны толордулар. Айтал Прокопьев «Ийэҕэ махтал», Алиса Монастырева «Хатыҥ», Милена Гоголева «Дэгэрэҥ» попурри ырыалара, бөлөҕүнэн «Чороонноох үҥкүү», Сайнаара Петрова «Долганочка» соло үҥкүүтэ, «Дьолуо» фольклорнай бөлөх ырыалара-тойуктара, «Мөҥүрүүр Бөҕө» олоҥхо хас биирдии кэлбит көрөөччү, төрөппүт биһирэбилин ылан ытыс дохсун тыаһынан махтаннылар.
Түмүккэ дьүүллүүр сүбэ кэнсиэр уопсай баала 8,16 дэһээтэйгэ тэҥнэспитин иһитиннэрдэ.
